Back to Home

Una recensione in friulano del libro Zero Positivo di Cristina Marginean Cocis

Una recensione pubblicata sul Bollettino parrocchiale n. 58/2017 di Cassacco (Udine), scritta da Mirella M.

 

MEMORIIS E RICUARTS

O ai apene finît di lei un libri: si clame “Zero positivo”, lu à scrit Cristina Marginean Cocis, une mestre rumene ch’e vîf e insegne culì di nô. Al è un libri une vore particolâr dulà che Cristina e conte, cun tante sensibilitât e delicatece, la sô esperience di malatie, ma ancje di vite; di soference sì, ma ancje di sperance, di fede, di agrât. O sin tal 2009 e jê e vîf culì in Friûl cu la sô famee; e à une frute, Ioana, di cuatri agns e e à apene savût che spiete un altri frutin. E je dute contente, ma une dì, fasint i esams di control, j cjatin i valôrs dal sanc ducj sbalâts; le ricoverin e dopo altris esams j dan la diagnosi: “leucemia promielocitica acuta”. Il professôr dal repart di Ematologjie da l’Ospedâl di Udin nol sa dâi nissune percentuâl di sorevivence, parcè che no l’ è mai stât un câs di une malade di L.A.P. in gravidance e ancje lôr no san ce dî. Cussì e comencin lis curis e prin di dut al comence il so isolament sierade intune stanzie, dibessole. E jentrin miedis e infermîrs scuindûts in tai cjamesots e in tes mascarinis e ogni tant, sôl par un moment , i siei di cjase. Alore e comencin lis lungjis zornadis tacade ae flebo de chemioterapie, i dolôrs e il malstâ pes medisinis, la pôre e la angosse par il frutin dentri di sè e pe sô famee, la disperazion… simpri sierade in che stanzie. Ma Cristina e je une femine di caratar, plene di sgrimie, e sa che e à di cjatâ dentri di sè la fuarce di frontâ dut, parfin la solitudin. In fin dai conts e dîs, o ai ancje biei ricuarts: le memorie e sarà il gno rifugjio. Alore, un pôc a la volte, il so cjâf la puarte indaûr tal timp a cuant che jere frute, in Romanie: ai biei moments de sô infanzie serene, lis gjitis in campagne cu la famee, i biei moments cu lis amiis di scuele, la fieste di Nadâl, cul arbul e lis lusutis… ma e son ancje ricuarts dolorôs, parcè che si impense che chê fieste le vevin fate di scuindon , cence fasi ni viodi ni sintî, a riscjo de preson o piês. Cun di fat intai agns 80, sot il regjim di Ceausescu, al jere imponût “l’ateismo di stato” e perseguide ogni forme di religjon: inte lôr famee ,un grum religjose, e preavin di scuindon. I riguarts e continuin a fâi compagnie intes lungjis zornadis, simpri tacade ae flebo, sierade in chê cjamare di ospedâl; di dì e di gnot, un alternâsi di siums e di vegle che al devente un torment. Si impense dal clime di ansie e di pôre che vivevin in che volte, cu la pôre di jessi denunziâts se no jerin vonde “ bravi comunisti”, parcè che al sucedeve dispès che chês fameis e vignivin fiscadis: pari e mari in preson, i fîs in tal colegjo di regjim, dopo une denunzie di un vicin di cjase o ancje di un parint alla Securitate, le polizie politiche. Intant la sô cure e va indevant, dopo un pôc i miedis i disin che e je rivade a un pont critic, in “aplasia”, no à plui nissune difese imunitarie: l’ isolament al devente ancjemò plui strent. Ancje tal so cjâf si rive ai moments plui dolorôs: so pari al ven arestât de Securitate, e a la fin depuartât intun cjamp di lavôr sul Danubio. Al è pardabon un moment critic e dolorôs par jê: ma e sa che e scuen ancjemò cjatâ la fuarce di frontâ dut e cirî di lâ indevant , preant, veglant, pensant ai siei fruts e ae sô int. Tal doman e comencin a fâi une trasfusion di sanc, la prime di tantis: il so grop al è zero positîf. Cristina e capìs cetant impuartant ch’al è chel sanc par jê, parcè che al dà fuarce al so cuarp; ma e pense ancje a chê persone foreste e mai viodude che cu la sô gjenerositât j salve la vite, une gjenerositât ch’al devente un at d’amôr gratuit viers chel ch’a l’è dongje che la jemple di maravee e soredut di agrât. La cure e va indevant, lis zornadis e passin lentis e il so pinsîr al continue a cirî tai cjantons scuindûts dal so cjâf memoriis, afiets, dolôr… Si impense, come intun brut sium, di cuant che je lade a cirî so pari intai cjamps di lavôr sul Danubio: judade dal so ami Hyun Do e di pari Serafim, tra pericui di ogni sorte, e rive fin su lis isulis dal delta par cirî di viodi dulà ch’al jere. Cussì dentri di sè e pense che se in che volte e veve vût chê fuarce e chel coragjo par fâ chel viaç disperât, cumò e à di cjatâ il stes coragjo e la stesse fuarce par frontâ la malatie. Si inacuarç che à dongje di sè sul comodin propit la piçule crôs di len che j veve fat pari Serafim in chê volte, che ae devente par jê simpri di plui simbul di fede e di sperance. Biadelore e son rivâts i prins segns di miorament, il so cuarp al rispuint e al comence a cjapâ fuarce. I miedis e comencin a pensâ a cuant e cemût che e podaran fâ nassi il so frutin. Tal ultin al è propit il pinsîr di so pari che j dà fuarce: come intun sium lu viôt come in che volte: di lontan, daûr il veri di un barcon de preson, strupiât e plen di pachis ma che no si rint e inzenoglât al pree ancje par jê. A la fin e capìs che il destin di un gjenitôr al è intal amôr pai siei fîs ch’al cjape dentri ogni sacrifici, cussì la sô stanzie di ospedâl no je plui une scjaipule, ma la pussibilitât di vuarî par restâ cui siei fîs, come ch’al veve fat so pari tai moments plui grivis, cul coragjo de sperance e de fede. E ve che finalmentri , dopo 55 dîs di chemioterapie, al nas a 31 setemanis il so frutin: Victor che al pese 1700 grams ma al è plen di vite e, cun cheste “vitorie”, il libri al finis. Cumò Cristina e va ator a presentâ il so libri par sensibilizâ a dâ il sanc e o pensi che al sedi il mût plui biel di mostrâ il so agrât. A mi mi à plasût cetant ancje un altri aspiet che jê nus conte: l’ impuartance de memorie. Ognidun di nô al à une cjame di esperiencis, afiets, storiis, sintiments, emozions ingrumadis inte vite e dutis , bielis e brutis lis tignìn dentri di nô. La storie di Cristina nus insegne ch’al è propit alì che o vin di cirî la fuarce intai moments plui grivis. Ancjemò di plui: o vin di imparâ a ingrumâ simpri plui “in te nestre cjame” parcè che ogni gnove esperience al po fânus deventâ un pôc plui fuarts e o vin di fâ tesaur di dut ce nus insegne la vite. Mi plâs pensâ che dutis lis personis che o scuintrin e sedin par nô un pôc mestris: o vuei memoreâ dôs di lôr ch’e son mancjadis di pôc timp e che an lassât une olme, ancje se in mût diferent, inte mê vite. La prime e je me agne Marie; nassude intal 1922 a Damâr e a passât la sô zoventût su la mont Mariane. Timps di miserie, di fan, di fadie. Ancje dopo che à maridât barbe Fredo e à continuât a lavorâ cun passion te campagne, in Cjargne, cun dutis li sôs “besteutis”. Cuant che o vevi i fruts piçui, o lavin dispès a cjatâle e je ur mostrave, cun braùre, il vidielut te stale e cemût che molzeve la Bele, intant che i fruts la cjalavin imbambinîts. Al dîs Celestin Vezzi intune sô poesie: “ Las feminas cjargnelas son dome mans! Mans gropolôsas, deits ch’ai cjalin par ogni viers; mans ch’a si ingegnin. Mans ch’as si picjin tas pusjuts das vacjas, par molgi chel got di lat. Mans ch’as alcin chês forcjas par tirâ fûr ce che la tiere a dà! Mans che si adatin encje cu la falç par seâ chei froscs di jerbe. Mans ch’as tegnin strentas chês cuarnulas cun lougias cjamadas di fen, o di legnas, o di dut. Mans ch’a si picjin su chês bracedorias par puartâ chei geis simpri plens di alc. Mans ch’a si movin tra chei spolerts par meti adum alc da fruçâ. Mans ch’as strengin chês schenas di oms ch’ai tornin cu la valîs…”. Alore a agne Marie, ma o zonti ancje a me none Milie, a me agne Gjeme e a “ dutas las feminas cjargnelas”, al va il gno agrât e il gno afiet par vêmi insegnât la dignitât dal lavôr. Ancje Pierluigji Cappello mi à insegnât cetant. No lu ai cognossût di persone, ma sôl leint i siei libris. No vuei dâ un judizi su ce ch’al à scrit, che no mi sta a mi e no soi in grât; o pensi ae sô storie e ae lezion di grande dignitât che nus à dât. Al conte intal libri “Questa libertà” de sô infanzie a Scluse e mi plâs pensâ a chel frutin ch’al coreve pal paîs, che si scuindeve a cavalot dal ramaç di un arbul a lei un libri… e si dismenteave di ducj. Cheste sô grande passion pe leture lu à judât cuant ch’al jere intal ospedâl, parcè che leint, … il so jet al deventave un tapêt ch’al svolave su lis alis de fantasie intun mont simpri gnûf. La sô grande capacitât e curiositât culturâl lu a puartât, cul timp, a deventâ chel grant poete che ducj e an preseât ancje parcè che lui al fat tesaur de sô “cjame personâl”: nol à mai dismenteât lis sôs lidrîs, il so paîs, la sô int, la sô lenghe che o cjatin in chês pagjinis plenis cuasi di une timide tenarece. La sô grande fuarce morâl j à fat frontâ la sô infermitât cuntune dignitât e un pudôr ch’e son la plui grande lezion di integritât morâl che nus lasse Pierluigji; cumò mi plâs pensâ ch’al sedi finalmentri tornât a cori lassù sui prâts di Scluse. “ …“ Jo? Jo o voi discolç viers inniò”, i siei voi il celest, piturât di un bambin.” O ai let di cualchi bande che “ cuant che i vîfs e pensin ai muarts, lôr, lassù in paradîs e san che ur volin ben, e e son contents.” Jo o continui a pensâju!

Novembar 2017